Британияда Боб аттуу белгилүү мышык өлдү

Музыкант жана жазуучу Жеймс Боуэн өзүнүн дүйнө окурмандарына белгилүү бир нече китебинин чыныгы каарманы болуп келген Боб аттуу мышыгынын өлгөндүгү тууралуу билдирди.

Анын айтуусу боюнча мышык 15-июнь күнү 14 жаш курагында өлгөн. Чыккан китептер менен тартылган көркөм тасмалардан улам Боб миңдеген адамдар менен таанышып, миллиондогон адамдарга жагымдуу таасир эткен.

Боб аттуу бул белгилүү мышыкты Боуэн 2007-жылы көчөдөн таап алган. Белгилей кетчү нерсе, аталган мышык тууралуу «Көчө мышыгы – Боб», «Дүйнө Бобдун көзү менен», «Боб аттуу мышыктын белеги», «Боб жардамга ашыгат» аттуу балдарга арналган китептер жарык көрүп, бир эле Улуу Британиянын өзүндө миллиондогон нуска менен сатылган. Ал эми 2016-жылы мышык тууралуу «Боб аттуу көчө мышыгы» деген көркөм тасма тартылган.