«Санарип Вет» бардык чек ара пункттарында иштеп жатат

 Белгилей кетсек, министрликте жалпы 35 маалыматтык тутум болсо, анын 22си толук кандуу ишке киргизилген. Ал эми 10 кызмат иштеп чыгуу стадиясында. Бүгүн сиздерге Ветеринария, мал чарбасы, жайыттарды жана тоюттарды өнүктүрүү кызматынын «Санарип VET» системасы боюнча маалымат беребиз.

 Ветеринария, мал чарбасын, жайыттарды жана тоюттарды өнүктүрүү кызматы жаныбарлардан алынган азыктардын кыймылына байкоо жүргүзүү максатында «Санарип VET» автоматташтырылган маалыматтык системасын жигердүү колдонуп жатат. Бул тутум кызматтын борбордук аппаратынын, аймактык бөлүмдөрүнүн жана мамлекеттик чек арасындагы ветеринардык көзөмөл пункттарынын ортосунда маалымат алмашууну камсыз кылат.

 Система «Түндүк» жана «Инфоком» мамлекеттик ишканасынын «Бирдиктүү идентификациялоо системасы» (ЕСИ) менен туташтырылып, бардык электрондук документтер цифралык колтамга менен тастыктоого шарт түзүлдү.

Азыркы учурда:

«Санарип Вет» бардык чек арадагы ветеринардык пункттарда жана аймактык башкармалыктарда иштеп жатат;

инспекторлор жана адистер тутумду күн сайын ишинде колдонушат;

Кыргызстанга алып келинген бардык жаныбарлар жана жаныбар тектүү азыктар тутумда милдеттүү түрдө катталат;

ветеринардык документтер, анын ичинде сертификаттар жана ветеринардык кароо актылары, ушул тутум аркылуу электрондук түрдө таризделет.

Мурда ветеринардык документтер кагаз түрүндө гана берилчү. Азыр аларды электрондук форматта тариздөөгө мүмкүнчүлүк бар, анын ичинде:

ЕАЭБге тиешелүү 4 түрдөгү ветеринардык сертификат;

үчүнчү өлкөлөрдөн келген товарлар үчүн 49 түрдөгү ветеринардык сертификат.

«Санарип VET» системасынын негизги максаты – ветеринардык көзөмөлгө алынган азыктарды идентификациялоо жана көзөмөлдөө процесстерин камсыз кылууга, өлкөгө кирүүчү контрафакттык продукцияга каршы күрөштү күчөтүүгө, калктын тамак-аш коопсуздугун жакшыртууга жана чыңдоого мүмкүндүк берүү.