Бүгүн, 3-ноябрда, Кыргыз Республикасынын Президентине караштуу Инвестициялар боюнча улуттук агенттиктин башчысы Равшанбек Сабиров «CSCEC» компаниясынын «2-инженердик бюросунун» өкүлдөрү менен жолугушту.
Жолугушуунун жүрүшүндө тараптар кызматташуунун багыттарын жана компаниянын Кыргызстандагы инвестициялык жана инфраструктуралык долбоорлорду ишке ашырууга катышуу мүмкүнчүлүктөрүн талкуулашты. Атап айтканда, Майлуу-Суу шаарында кубаттуулугу 26 кВт болгон чакан гидроэлектр станциясын куруу, ошондой эле Асман шаарын куруу демилгелери каралды. Мында компаниянын долбоорлорго катышуусунун мүмкүн болгон форматтары жана каржылоо тартуу маселелери талкууланды.
Мындан тышкары, тараптар инвестициялык кызматташтыктын артыкчылыктуу багыттарын, мамлекеттик колдоонун колдонуудагы чараларын жана тиешелүү мамлекеттик органдар менен өз ара аракеттенүү механизмдерин карап чыгышты. Инвестициялык демилгелерди даярдоо жана ишке ашыруу баскычтарында иш-аракеттерди координациялоо маселелерине да өзгөчө көңүл бурулду.
Жолугушуунун жыйынтыгында тараптар мындан аркы кызматташтыкты өнүктүрүүгө жана талкууланган долбоорлорду иштеп чыгууну улантууга өз ара кызыкдар экендиктерин билдиришти.
