Кытай Кыргызстанга 100 млн доллар берүүгө даяр
Президент Садыр Жапаров 16-сентябрда, Кытайдын мамлекеттик кеңешинин мүчөсү, тышкы иштер министри Ван Ини кабыл алды. Бул тууралуу президенттин маалымат кызматы кабарлады.
Жолугушууда коопсуздук жана коргоо, соода-экономикалык кызматташтык, инвестиция тартуу, «Кытай-Кыргызстан-Өзбекстан» темир жолунун курулушу, Ооганстандагы кырдаал тууралуу сөз болду.
Жапаров Кыргызстан Кытай менен соода алаканы өнүктүрүүгө, биргелешкен инвестициялык долбоорлорду ишке ашырууга кызыкдар экенин билдирди.
Ошондой эле эки өлкө ортосундагы аба каттамдарды жандандыруу керектигин айтты.
Кытайдын тышкы иштер министри Ван И Садыр Жапаровго жана кыргыз элине КЭР төрагасы Си Цзинпиндин жылуу саламын жана кайрылуусун жолдоду.
Аны менен бирге Ван И Кытай өкмөтү социалдык-экономикалык өнүгүүсүн колдоо иретинде Кыргызстанга 650 млн юань (100 млн доллар тегереги) бөлүүгө даяр экенин белгиледи.
Андан тышкары коронавируска каршы 1 млн доза вакцина жана медициналык каражаттар берилерин билдирди.
Ван Инин айтымында, Кытай автоунаа жолдорун куруу жана ирригациялык түйүндөрдү кеңейтүү тармактарында биргелешкен долбоорлорду ишке ашырууга кызыкдар.
