Адис көздүн алды, кол-буттун шишип калышынын себептерин айтты

Көздүн алды, беттин шишип калышы, байпактын резинасынын издери бутка түшүп, колго шакектин тагылышы кыйындаган абал суюктуктун организмде туруп калышынан кабар берет. Диетолог Екатерина Казачкова Sputnik радиосуна курган маегинде бул кандайдыр бир оору же тамактануунун бузулушу менен байланыштуу экенин түшүндүрүп берген.

«Шишик – бул калкан безинин начар иштешинен пайда болот. Тагыраагы, адамдын рационунда белок жетишсиз болуп, туз менен глюкозанын көбөйүшүнөн улам жаралган абал. Адам диета кармабай таттуу, туздууларды ашыкча жегенде организмден суюктуктун чыгышы кыйындайт», — деп түшүндүргөн Казачкова.

Дарыгер шишиктен арылуу үчүн адегенде калкан безинин иштешин жөнгө салуу кажет экенин, андан кийин тамактанууну иретке келтирүү зарылдыгын айткан.

«Адам салмагын азайтуу аракетин көрүп, калкан безинин иштешин текшертип, рационунда белокту көбөйтүп, туз, кумшекерди азайтса шишик акырындан тарайт. Тузду суткасына беш граммга чейин колдонуу — норма. Бирок ошол эле учурда түрдүү соустарда, майонез, кетчупта, дүкөндөрдөн сатып алган азыктарда да туз бар экенин эске алуу зарыл. Таттуулар, камырдан даярдалган азыктар, газдалган шире суусундуктар жана спирт ичимдиктери да организмге керексиз болгон кошумча глюкоза», — деген диетолог.

Адис организм үчүн суунун маанилүүлүгүн да эскертип, анын күнүмдүк нормасын бузбоого чакырды. Айтымында, суунун суткалык нормасы — бир килограмм салмакка 30 миллилитр. Эгерде биз сууну аз ичсек организм суюктукту денеден чыгарбай кармаганга аракет кылат деп түшүндүргөн адис.