Аял кызын аюунун короосуна ыргытып жиберген. Окуянын себеби айтылды

Ташкенттеги зоопарктагы үч жашар кызын аюунун короосуна ыргыткан аял күйөөсү Орусияга кеткени үчүн депрессияга кабылганын билдирди. Бул тууралуу жергиликтүү басылмалар жазышты.

Өзбекстандын Махаллаларды жана үй-бүлөнү колдоо министрлиги аял учурда жумушсуз экенин, ага жана анын балдарына бир нече жолу социалдык-укуктук жардам көрсөтүлгөнүн маалымдашты.

«Жаран З.Т. эки баласы менен Ташкенттин Сергели районунун Кумарык айылындагы (жергиликтүү квартал – ред.) атасына тиешелүү батирде жашап, аял күйөөсү Орусияга кеткендигине байланыштуу депрессияга түшкөнү, жолдошу  аны менен жашабай турганы белгилүү болду», — деп билдирди мекеменин басма сөз кызматы.

Учурда укук коргоо органдары окуянын чоо-жайын иликтеп жатышат.

Эске салсак, 28-январь күнү саат 12:00дөр чамасында   Ташкентте аял кичинекей кызды зоопарктагы аюунун короосуна ыргытып жиберген. Аю арыкка түшүп, кыздын жанына келип, баланы жыттап, ары басып кеткен. Жумушчулар баланы сактап калышкан.