2023-жылдын октябрынан бери Газа тилкесинде Израилдин аткылоосу учурунда маалымат каражаттарынын кеминде 256 кызматкери каза тапкан. Бул тууралуу ТАСС Газа тилкесинин бийлигинин басма сөз кызматы жарыялаганын жазды.
Маалыматка караганда, палестиналык гезитте иштеген Мохаммед аль-Мунирави аба соккусунан каза болгон. Аль-Мунирави аялы менен бирге Нусейрат качкындар лагеринде көз жумган.
28-октябрда Израилдин премьер-министри Биньямин Нетаньяху Газа тилкесине ири аба соккуларын жасоого буйрук берген. Премьер-министр бул чечимди палестиналык ХАМАС кыймылынын жактоочулары Израиль тараптын маалыматы боюнча, Газа тилкесинин түштүгүндөгү Рафах аймагында Израиль аскерлерине ок атып, ок атышууну токтотуу келишимин бузгандан кийин кабыл алган. Израиль армиясы анклавдагы бир нече аскердик буталарга кол салуу менен жооп кайтарган. ХАМАС Рафах окуясына тиешеси жок экенин билдирип, ок атышууну токтотуу келишимине болгон милдеттенмесин сактап калган. Акыркы маалыматтарга ылайык, Израиль күчтөрүнүн түнкү чабуулдарынан жүздөн ашык палестиналык каза болгон.
Эске салсак, Жакынкы Чыгыштагы кырдаал 2023-жылдын 7-октябрында кескин курчуган. Газанын Саламаттыкты сактоо министрлигинин акыркы маалыматтарына ылайык, тилкеде согуштук аракеттердин натыйжасында каза болгон палестиналыктардын жалпы саны 68 миңден ашты, 170 миңден ашык адам жаракат алды. Ушул жылдын 6-октябрында Израиль менен ХАМАСтын делегациялары Египет, Катар, АКШ жана Түркиянын ортомчулугу менен Газа жаңжалын чечүү боюнча сүйлөшүүлөрдү кайра баштаган. 9-октябрда жаңжалдын тараптары АКШнын президенти Дональд Трамп тарабынан мурда сунушталган тынчтык планынын биринчи этабын ишке ашыруу боюнча келишимге кол коюшкан. Газадагы ок атышууну токтотуу келишими 10-октябрда күчүнө кирген болчу.
