Россия өз аймактарын күйүүчү-майлоочу май менен камсыздоодо кыйынчылыктарга кабылганына карабастан, Кыргызстанга жеткирүүнү улантууда. Бул тууралуу министрлер кабинетинин мурдагы төрагасы Акылбек Жапаров Sputnik Кыргызстан агенттигине берген маегинде билдирди.
Анын айтымында, өлкө энергетикалык коопсуздукка жетүү үчүн россиялык өнөктөштөр менен биргеликте ата мекендик мунайды кайра иштетүүнү жана углеводороддорду казып алууну өнүктүрүү зарыл.
Жапаров “Жунда” заводун модернизациялоо дээрлик аяктап калганын, ушундай эле иштер Жалал-Абаддагы ишканада да жүргүзүлүп жатканын белгиледи. Ошондой эле мунай жана газ кендерин биргелешип иштетүү, “Газпромдун” технологияларын жана адистерин тартуу мүмкүнчүлүгүн кароону сунуштады.
“Россия келишимдик милдеттенмелерин аткарбай койгон бир дагы учур эсимде жок”, — деди ал.
Жапаров күйүүчү май импортунан көз карандылыкты азайтуу үчүн Кыргызстанга чийки заттын жаңы булактары керектигин кошумчалады. Мындан тышкары, электр энергиясына болгон өсүп жаткан суроо-талап өнөр жай жана санариптик экономика үчүн негизги чектөөлөрдүн бирине айланып баратканын баса белгилеп, атомдук энергетиканы өнүктүрүүнү колдоп чыкты.
Булак: Sputnik Кыргызстан
