Активист Мирлан Ураимовдун кармалышынын мыйзамдуулугун прокуратура карайт
“Бүтүн Кыргызстан” партиясынын мүчөсү Мирлан Ураимовдун кармалышынын мыйзамдуулугун бүгүн прокуратура карайт. Бул тууралуу башкы прокурор Курманкул Зулушев маалымат жыйынында билдирди.
Анын айтымында, активист социалдык тармактарга бийликти алмаштырууга чакырган комментарий жазган.
«УКМК кылмыш ишин козгоп, кечээ Мирлан Ураимов 48 саатка камакка алынган. Тиешелүү экспертиза жүргүзүлгөнбү, бүгүн такталат. Албетте, кимдир-бирөөнү кемсинткени үчүн иш козгоо туура эмес. Бирок, эгер текст айрым чалуулар үчүн мааниге ээ болсо, адам жооп бериши керек», — деди ал.
Буга чейин Мирлан Ураимов социалдык тармактагы билдирүүсү үчүн кармалганы белгилүү болгон. Социалдык тармакта Мирлан Ураимов аттуу колдонуучу жазды делген пост жарыяланды. Төмөндө кыргыз тилинде бийликти алмаштыруу керек, жакшы иштебей жатат деп жазылып турат. Кармалган жаран өзү муну жазган эмесмин дейт. Мирлан Ураимов бул баракча эчак эле бузулуп, аны колдонбогонун айтты. Анын айтымында, жазуу стили аныкы эмес.
