Садыр Жапаров: «Бир гана сураныч. Элчиликтерди тынч койңуздар»
Президент Садыр Жапаров социалдык тармактагы баракчасына билдирүү калтырып, эртеңки боло турган акция боюнча пикирин билдирди.
Төмөндө текстти өзгөртүүсүз беребиз.
«Урматтуу кыргызстандыктар!
Мага жеткен маалыматтар боюнча кандайдыр бир топ эртең акция уюштуруп, Бишкектин көчөлөрүндө жөө жүрүш жасап, элчиликтердин алдына барабыз деген ниеттерин билдиришиптир.
Ар бир ниеттин же кадамдардын чеги болот.
Элчиликтер жана анын аянтчалары башка мамлекеттердин менчиги болуп саналат. Кол тийгис. Дүйнө жүзүндө биздин дагы элчиликтерибиз бар. Алар дагы биздин кол тийгис аянтыбыз. Бирөө жарым келип, эшигин каккылап, баш аламандык кылганга акысы жок. Албетте биз демократия багытынан кайтпайбыз. Жарандарыбыздын оозун тыйбайбыз. Укугун чектебейбиз. Митингдер сөзсүз болуш керек. Ал үчүн Горький паркын аныктап бердик. Кааласаңыздар 24 саат бою митинг кылыңыздар. Каалаган сөзүңүздөрдү, пикириңерди айтыңыздар. Эч ким каршы эмес.
Бир гана сураныч.
Элчиликтерди тынч койңуздарчы», — деп жазат мамлекет башчысы.
