Кырсыкка учурап айдоочусу каза болгон унаадан 3 кг гашиш банги заты табылды

10.12.2020

2020-жылдын 7-декабрь күнү Баткен районунун Жаңы-Жер айылы аркылуу өтүүчү Ош-Исфана унаа жолунун 221 чакырымында “Хендай солярис” үлгүсүндөгү автоунаа жолдон чыгып кетип, автоунаанын айдоочусу ошол жерде каза болгондугу боюнча маалымат Баткен РИИБне катталып, окуя болгон жерге Баткен РИИБнин ыкчам-тергөө тобу чыгып кароо жүргүзөт.

Окуя болгон жерге, кырсыкка учураган автоунаага кароо жүргүзгөндө автоунаанын техникалык паспорту жана айдоочулук күбөлүк табылып, автоунаанын айдоочусу Жалал-Абад облусунун 31 жаштагы А.Ж.аттуу тургуну экендиги аныкталган.
Бул факт Баткен РИИБнин КЖБРне Кыргыз Республикасынын Жазык кодексинин 297-беренесинин (автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу) негизинде катталып, сотко чейинки өндүрүш иши башталат.
Сотко чейинки өндүрүш ишинин алкагында автоунаага кароо жүргүзгөндө унаанын арткы жүк салгычынан кызыл-кара түстөгү “Sports” деген жазуусу бар спорттук сумка табылып алынып, ага кароо жүргүзгөндө сумканын ичинен 3 даана атайын целлофан пакетке оролгон өзгөчө жыты бар, болжол менен жалпы салмагы 3 кг болгон банги затына окшогон зат табылып алынган.
Алынган банги затына окшогон затка экспертиза дайындалып, экспертизанын корутундусунда гашиш банги заты экендиги аныкталган.
Азыркы учурда бул иштер боюнча тергөө иштери жүрүп жатат.