Ошто 2,5 жашар кызды уурдоого шектелип 38 жаштагы жаран кармалды

Ош шаарында 2,5 жашар кызды уурдоого шектелип 38 жаштагы жаран кармалды. Бул тууралуу шаардык милициянын маалымат катчысы Абсатар Тавакалов билдирди.

Окуя 2-июлда болгон. Милицияга кыздын энеси арыз жазган.

«Ыкчам тергөө тобу окуя болгон жердеги байкоочу камералардан 35-40 жаш чамасындагы эркек киши наристеге сүйлөп, ээрчитип баратканын көрүшкөн. Натыйжада Ак-Буура районунун криминалдык милиция кызматкерлери кызды аман-эсеп таап, ата-энесине өткөрүп беришкен. Шектүү 38 жаштагы Алай районунун Ч.А. аттуу тургуну экени аныкталган», — деп айтылат билдирмеде.

Аталган факты боюнча Жазык кодексинин 170-беренеси менен («Киши уурдоо») кылмыш иши козголгон. Шектүү убактылуу кармоочу жайга киргизилди.

Кичинекей кызга тийиштүү экспертизалар дайындалып, иликтөө амалдары жүрүүдө.