Иликтөө: Жапаровго элдин 32%ы, Ташиевге 24%ы ишенет

Кыргызстандыктардын 32 пайызы президент Садыр Жапаровго ишенет. Мындай маалымат Center for Insights in Survey Research (CISR) Эл аралык республикалык институттун буйрутмасы менен SIAR Research and Consulting компаниясынын изилдөөсүндө көрсөтүлөт.

Изилдөө 6-16-июль аралыгында мобилдик жана үй телефондору аркылуу интервью жолу менен жүргүзүлгөн. Сурамжылоого 18 жана андан жогору жаштагы 1 миң 211 кыргызстандык катышты.

“Кайсы саясатчы же коомдук ишмерге көбүрөөк ишенесиз?” деген суроого кыргызстандыктардын 32 пайызы Садыр Жапаровду айткан. Андан кийин Камчыбек Ташиев (24%), Нуржигит Кадырбеков (9%), Адахан Мадумаров (6%), Улукбек Марипов, Артём Новиков, Өмүрбек Бабанов, Дастан Бекешев (4%), Алмазбек Атамбаев, Өмүрбек Текебаев, Жанар Акаев, Мелис Мырзакматов, Темирлан Султанбеков (2%), Ассоль Молдокматова, Аскар Акаев, Сапар Исаков, Бабур Төлбаев, Мыктыбек Арстанбеков, Сооронбай Жээнбеков, Сыймык Жапыкеев, Жылдызкан Жолдошева, Жаныбек Абиров, Бакыт Төрөбаев (1%) турган.

Ал эми сурамжылоого катышкандардын 20 пайызы эч кимге ишенбей турганын айткан.