Катуу шамал жана кар. Монголияны чаңдуу бороон каптады

Бейшемби, 3-мартта Монголиянын борбордук Төв провинциясында чаңдуу бороон болду.

Монголиянын метеорология жана айлана-чөйрөнү көзөмөлдөө боюнча улуттук агенттиги (NAMMMOS) аба ырайынын болжолдоосун жарыялады, ага ылайык, жакынкы күндөрү Монголиянын борбордук, чыгыш жана түштүк аймактарында калың кар жаашы, катуу шамал жана сары чаңдуу бороондор күтүлөт.

Мамлекеттик орган чаңдуу бороондун көп болушун климаттын өзгөрүшү менен да байланыштырды.

Дүйнөдөгү көчмөн мамлекеттердин бири болгон Монголияда жаз мезгилиндеги катуу шамал, чаңдуу бороондор жана бороон-чапкындар кадимки аба ырайына айланды. Айлана-чөйрө жана туризм министрлигинин маалыматына караганда, акыркы жылдары климаттын өзгөрүшүнө байланыштуу чаңдуу бороондор тез-тез болуп жатат.