Өлкөдө 2021-жылы электр энергияга болгон баа өзгөрүүсүз калат
2021-жылы электр энергиясына болгон тарифтер өзгөрүүсүз калат. Мындай чечим президент Садыр Жапаров менен жолугушуудан кийин кабыл алынды, анда тариф саясаты талкууланды, деп билдирди энергетика жана өнөр жай министри Доскул Бекмурзаев.
“Бийик тоолуу аймактардын жашоочулары электр кубатын керектөө көлөмүнө карабастан жыл бою бир киловатт саатына 0,77 тыйындан төлөшөт. Калган жашоочулар 700 киловатт-саатка чейинки керектөө үчүн 0,77 тыйындан жана лимиттен ашыкча 2,16 сомдон төлөшөт”, – деп билдиришти башкармалыктан.
Президент Садыр Жапаров 21-апрелде энергетика тармагынын ардагерлери жана энергетикалык компаниялардын жетекчилери менен болгон жолугушууда калк үчүн 700 кВт/с лимитти алуу боюнча маселени карап чыгууну сунуштаганын басма сөз кызматы билдирген.
Июнь айында Энергетика жана өнөр жай министрлиги 2021-2025-жылдарга тарифтик саясат боюнча токтомдун долбоорун коомдук талкууга койду. Анда суунун аз мезгилине жана керектөөнүн өсүшүнө байланыштуу 2021-жылы электр энергиясынын таңкыстыгы 3 миллиард кВт саатка чейин жетиши күтүлүп жаткандыгы жана учурдагы тарифтер ресурстарды өндүрүүгө, берүүгө жана бөлүштүрүүгө кеткен чыгымдарды жаппай тургандыгы айтылат.
Энергетика министрлиги тарифтерди этап-этабы менен көтөрүүнү сунуштаган. Биринчиден, калк үчүн тарифти 1 сом 9,5 тыйындан белгилөө, ал жыл сайын жогорулап, 2023-жылга чейин кВт / саатына 1 сом 48 тыйынды түзөт. 2024-жылдан тарта тариф инфляциянын деңгээлине жараша жөнгө салынары айтылган.
