Камчыбек Ташиев: «Эки айда «Кумтөрдөн» 90 миллион доллар пайда таптык»

25-сентябрда, УКМКнын төрагасы Камчыбек Ташиевдин катышуусунда Улуттук коопсуздук мамлекеттик комитетинин Ош шаары жана Ош облусу боюнча Башкы башкармалыгынын Алай райондук бөлүмчөсүнө курулган жаңы имараттын ачылыш аземи болуп өттү. Ага комитеттин аймактагы өздүк курамы жана жетекчилиги, атайын кызматтын ардагерлери жана жергиликтүү бийликтин өкүлдөрү катышты.

Ачылыш аземинде сөз сүйлөгөн УКМК башчысы Камчыбек Ташиев мындан ары да өлкөнүн аймактарындагы атайын кызматтын бөлүмдөрүнүн материалдык-техникалык базасын чыңдоо аракети активдүү улантылаарын белгиледи.

Ошондой эле, өз сөзүндө, УКМКнын башчысы быйыл, 2021-жылдын июнь-июль айларындагы иштин жыйынтыгы боюнча «Кумтөрдөн» мамлекетке 90 миллион доллар пайда түшкөнүн  белгиледи.

«Кумтөрдөн» 21 жылда 84 миллион доллар пайда тааптырбыз. Ал эми июнь жана июль айларында биз 90 миллион доллар таптык. Мына акчабыз каякта жатат. Кыргыз өлкөсүнүн акчасын талап-тоноп эле жеп жатышат. Биз алардын коррупциялык схемасын алып чыктык. «Кумтөрдө» айына 1 жарым, 2 тоннадан алтын өндүрүп, учак менен алып чыгып кетип турушкан. Бүгүнкү күндө 1 грамм алтын чыккан жок», — деди Ташиев.