Си Цзиньпин Зеленскийге «сүйлөшүүгө убакыт келгенде» телефон чаларын билдирди
Кытай Эл Республикасынын төрагасы Си Цзиньпин Украинанын президенти Владимир Зеленский менен Орусиядагы жаңжалды жөнгө салуу боюнча сүйлөшүүгө убакыт келгенде телефон чаларын билдирди. Бул тууралуу Франциянын президенти Эммануэль Макрон менен бирге Кытайда жүргөн Еврокомиссиянын башчысы Урсула фон дер Лейендин маалыматына таянуу менен Франс Пресс жазып чыкты.
«Президент Си [Зеленский менен] шарт жана убакыт келгенде сүйлөшүүгө даяр экенин ырастаганын угуу кызыктуу болду. Менин оюмча, бул оң белги», — деди ал Пекинде Кытай лидери менен сүйлөшүүлөрдөн кийин өткөн басма сөз жыйынында.
Си Цзиньпин Зеленский менен сүйлөшүүнү пландап жатканын француз дипломатиялык булагы да Франс Пресс агенттигине билдирди. Аты аталбаган француз дипломатынын айтымында, Кытай лидери бул тууралуу президент Макронго Кытайдагы сүйлөшүүлөрүндө айткан. Макрон ошондой эле «Си Цзиньпинге Орусияга Украинага каршы согушу үчүн колдонула турган эч нерсе бербөөгө басым жасады» деп кошумчалады сүйлөшүүлөргө катышкан дипломат.
29-мартта Зеленский Си Цзиньпинди Украинага келип кетүүгө чакырган. Украинанын президентинин айтымында, ал Кытайдын башчысы менен бир жылдан ашык убакыттан бери сүйлөшкөн эмес жана аны менен сүйлөшкүсү келет. The Wall Street Journal марттын башында Кытай лидери Зеленскийге Орусияга баргандан кийин телефон чалганын пландап жатканын жазган. Си Москвадан 22-мартта чыгып кеткен, бирок андан бери Киев сүйлөшүү болору тууралуу расмий ырастоо ала элек.
Макрон менен фон дер Лейен Кытайда иш сапары менен жүрүшөт. Си менен сүйлөшүүлөрдөн кийин Макрон Москва менен Киевдин ортосундагы жаңжал боюнча “Европаны бириктирген үн” болгусу келерин жана бул сапар “бул мамиленин ырааттуулугун баса белгилеши керек” деди. Макрон ошондой эле Кытай лидерин Орусияга таасир этүүгө, аны “акылга” жана “узак тынчтыкты орнотууга” жардам берүүгө чакырды. Азыркы учур Европа өлкөлөрүнөн Кытай менен болгон стратегиялык өнөктөштүктү жаңыртууну талап кылууда, ал дагы болуп жаткан окуяларга таасир эте алат, деп кошумчалады француз президенти.
Кытай Украинадагы аскерий операцияларга карата бейтарап позицияны карманарын, ошондой эле Украина менен Орусиянын ортосундагы сүйлөшүүлөрдүн кайра жанданышын колдой турганын билдирди. Украинанын президенти Владимир Зеленский буга чейин Кытай сунуштаган тынчтык планын ишке ашыруу мүмкүн эмес деп атаган, анткени анда орус аскерлерин Украинанын аймагынан чыгаруу боюнча пункт жок.
