Бишкектеги Кыргыз-Түрк достугу ооруканасы бейтаптарды кабыл ала баштады
Бишкекте бүгүн, 26-августта, кыргыз-түрк достугунун ооруканасы бейтаптарды кабыл ала баштады. Бул тууралуу Саламаттыкты сактоо министрлигинин басма сөз кызматы билдирди.
Билдирүүгө ылайык , августтун башында оорукананы бейтаптарды кабыл алууга даярдоо үчүн 30 дарыгер жана техникалык адис Кыргызстанга учуп келишкен.
«Кыргыз эли ачылышты көптөн бери күтүп келген. Акыры, кыргыз-түрк достугунун мамлекеттик ооруканасы бейтаптарды кабыл алууга даяр. Бул жерде биздин жарандардын чет өлкөгө чыкпай дарылануусуна мүмкүндүк бере турган жогорку технологиялык операциялар жүргүзүлөт. Баштапкы этапта оорукана жүрөк, кан тамыр жана көкүрөк оорулары менен ооругандарды кабыл алат. Бул жерде түрк адистери иштейт, КР Саламаттыкты сактоо министрлиги жергиликтүү дарыгерлерди тандайт », — деди саламаттыкты сактоо жана социалдык өнүктүрүү министри Алымкадыр Бейшеналиев.
Келишимге ылайык, оорукананы үч жыл бою Кыргызстан менен Түркия биргеликте башкарат. Бул адистештирилген жана бейтаптарды башка ооруканалардын жолдомосу менен гана кабыл алат.
Дарылоо процесси, башка ооруканалардагыдай эле, мамлекеттик кепилдиктер программасынын алкагында жүргүзүлөт. 2021-жылдын октябрь-ноябрь айларында гастроэнтерология жана жалпы хирургия бөлүмдөрүн ачуу пландалууда. Оорукана толук кандуу ишке даяр болгондо, эки өлкөнүн башчыларынын катышуусу менен расмий ачылышы пландалууда.
Ооруканада 72 керебет бар, алардын 21и реанимацияда. Ангиограф, компьютердик томография, магниттик-резонанстык томография, маммография, рентген, УЗИ, гастроскоп, эхокардиограф жана башка көптөгөн диагностикалык аппараттар бар.
Оорукананын медициналык кызматтарынын тизмеси жана баасы Монополияга каршы комитет тарабынан иштелип чыккан жана бекитилген. Чет өлкөдөн келген жарандар өзүнчө прейскуранттагы акы төлөнүүчү медициналык кызматтардан пайдалана алышат.
Түркиянын грантынын эсебинен курулган клиниканын курулушу 2016 -жылдын июнь айында башталып, 2017 -жылдын ноябрында аяктаган. 2020-жылы коронавирус пандемиясынын туу чокусунда, ал убактылуу COVID-19 жуктуруп алгандарды кабыл алуу жана дарылоо үчүн ачылган.
