Сузак районунда өзгөчө кырдаал режими жарыяланды, 606 турак үйдү сел суулары каптаган
Жалал-Абад облусунда 606 турак жайды сл суулары каптады. Бул тууралуу Өзгөчө кырдаалдар министрлигинен басма сөз кызматы кабарлады.
Маалыматка ылайык, кечээ, 4-майда нөшөрлөп жааган жаандын кесепетинен Сузак районунун Барпы жана Атабеков айыл өкмөтүндөгү 606 турак үйдү, 10 социалдык объектини сел каптаган.
Учурда өзгөчө кырдаалдар министринин орун басары жетектеген ыкчам топ жеринде тактоо иштерин жүргүзүп, Сузак районуна өзгөчө кырдаал режими киргизилди.
Жарандык коргонуу кызматынан 260 жаран, өздүк курамдан 135 куткаруучу тартылып, сел каптаган турак үйлөрдө чогулган сел сууларын мотопомпанын жардамы менен тазалоодо.
ӨКМден 12 бирдик техника, Жарандык коргонуу кызматынан 30 техника тартылып, күйүүчү май менен камсыздалды.
Учурда ыкчам штаб түзүлүп, кырдаалды жөнгө салуу жумуштары жүрүүдө.
